toki pona: tenpo pini lili la, jan li lon ma Mewika lon kulupu Kuwaka. nimi ona li jan pona pi jan ale (toki Inli la, nimi ‘Public Universal Friend’ anu nimi ‘PUF’). ona li mije ala li meli ala. tenpo ni la, toki Inli li jo ala e nimi sama nimi tonsi. ken la, ona li lon tenpo ni la, ona li tonsi! tenpo pini ona la, ona li tonsi ala. jaki li kama li ike tawa sijelo pi jan mute. ona li toki e ni: “mi moli. taso sewi li kama sin e mi, li weka e meli mi e mije mi” (ni li nimi ona ala li kon pi toki ona.) kulupu ona li weka e ona. taso ona li tawa kulupu ante mute li toki sewi tawa ona. ona li pali e kulupu pi jan pona. jan ni li pona tawa ona. taso jan ante li ike tawa ona. ona li wile sona e ni: “sina meli anu mije”. jan pona pi jan ale li toki e ni: “mi lon”. jan ike li toki e ni: “nimi moli sina li nimi sina” la, ona li toki e ni: “sina toki e ona”. ni li tan lipu Pipa. ona li moli la, jan mute li toki ike e ona li weka e kule tonsi ona. taso tenpo ni la, jan mute li toki e ni: “jan pona pi jan ale li jan tonsi pona tan tenpo pini. ni li pona tawa mi tan ni: mi ken lukin e jan sama mi lon tenpo pini.”