മലയാളം: മരണശിക്ഷ വിധിക്കപ്പെടുന്നതു മുതൽ കുരിശ് വഹിച്ച് ഗാഗുൽത്താ (കാൽവരി) മലയിലെത്തി കുരിശിലേറ്റപ്പെട്ട് മരിച്ച് കല്ലറയിൽ അടക്കം ചെയ്യപ്പെടുന്നത് വരെ ജറുസലേം നഗരത്തിലൂടെയുള്ള യേശുവിന്റെ യാത്രയാണ് കുരിശിന്റെ വഴിയിലൂടെ പ്രതീകാത്മകമായി ആവിഷ്കരിക്കപ്പെടുന്നത്. 14 പ്രധാന സന്ദർഭങ്ങളെ സൂചിപ്പിക്കുന്ന ദൃശ്യങ്ങൾ രേഖപ്പെടുത്തിയ 14 ഇടങ്ങളും ആലപിക്കാനുള്ള പ്രാർഥനകളും ഉണ്ട്. വയനാട് ചുരത്തിലും മറ്റും കുരിശിന്റെ വഴി ദീർഘമായ മലകയറ്റങ്ങളായി ആചരിക്കാറുണ്ട്. 17 ആം നൂറ്റാണ്ട് മുതൽ പള്ളികൾക്കകത്ത് തന്നെ റിലീഫ് ചിത്രങ്ങളോ പെയിന്റിംഗുകളോ ആയി ഒന്നു മുതൽ14 വരെയുള്ള കേന്ദ്രങ്ങളെ ആലേഖനം ചെയ്യുകയും അവയ്ക്ക് മുൻപിൽ ക്രമമായി പ്രാർഥനകൾ നടത്തുകയും ചെയ്യാറുണ്ട്. ദുഃഖവെള്ളിയാഴ്ചയാണ് ഈ പ്രാർഥനകൾ സാധാരണയായി നടക്കാറ്. തലശ്ശേരി സേക്രഡ് ഹാർട്ട് കോൺവെന്റിലെ ചാപ്പലിലുള്ള കുരിശിന്റെ വഴിയാണ് ഇത്. 1936ൽ സ്കൂളിന്റെയും കോൺവെന്റിന്റെയും 50ആം വാർഷികത്തോടനുബന്ധിച്ച് നിർമിച്ചതാണ് ഈ കെട്ടിടം. ഇന്നും നിറം മങ്ങിയിട്ടില്ലാത്ത തറയോടുകളും ഇപ്പോൾ ഉപയോഗിക്കാതെ വെച്ചിരിക്കുന്ന ചർച്ച് ഓർഗനും നിറമുള്ള ചില്ല് പിടിപ്പിച്ച ജനലുകളുമൊക്കെയായി ഭംഗിയുള്ള ചെറിയ പള്ളിയാണ്. 70കളിലും അതിലും മുൻപും ഉള്ള പ്രാർഥനാ പുസ്തകങ്ങളും ഇവിടെ സൂക്ഷിച്ചിട്ടുണ്ട്.