Afrikaans: Die Nederlandse taalmonument en Burgermonument in Burgersdorp, Oos-Kaap, Suid-Afrika
Met die 2de Britse besetting van die Kaap in 1806 het Engels die enigste ampstaal geword. Op 1 Mei 1882, d.i. 76 jaar later, is 'n wet deurgevoer wat Nederlands as Parlementstaal erken het. Op 15 Junie 1882 is Nederlands as taal van onderrig in skole toegelaat. Op die 26ste & 27ste Junie 1882 is die gebruik van Nederlands in Burgersdorp gevier, en Jotham Joubert het voorgestel dat 'n monument die geleentheid herdenk. Dit is op 18 Januarie 1893 onthul deur D.P. van den Heever, met S.J. du Toit wat die rede gelewer het. Tydens die boereoorlog het Britse soldate dit verniel en dele daarvan in King William’s Town begrawe. Lord Milner het die hele monument daarna verwyder, maar na protes het die Britte die dorp van 'n replika voorsien in 1907, wat op die 24ste & 25ste Mei 1907 onthul is, met redes deur President M.T. Steyn en outeur D.F. Malherbe. In 1939 is die oorspronklike opgespoor wat vanaf 1957 weer langs die kopie staan.^[1] Aan die regterkant staan die Burgermonument wat op 10 Januarie 1908 onthul is deur genl. de la Rey. Dit gedenk een burger van Bethuli en 12 burgers van Burgersdorp wat in die Tweede Vryheidsoorlog gesneuwel het.