جهلسری بلوچی: 18 اکتوبر 2020 ءَ سھب ءَ 9:40 ءُ 10:00 بج ءِ میان ءَ منی مات ءَ ڈن ءَ کوکار اش کُت۔ھمے کُوکار ءِ اش کنگ ءَ منی مات ڈن ءَ در کپت داں بہ چار ایت کہ چی بوھگ ءَ اِنت۔ڈن ءَ کہ شتگ دیستگ ئِے دو ٹولی اَنت وت ماں وتا جنگ اَنت۔ میتگ ءَ نزیک ءَ دگہ مردین نہ بوتگ کہ آیاں بوشُت ءُ گر ءُ دار بُہ کُتیناں۔ منی مات ءَ مار اتگ کہ اگاں آ اے میان ءَ دور مہ کنت کُشت ءُ کُشار بیت۔ھمے ھاتر منی مات روت کہ ھمے مردماں بہ گیشین اِت ،

منی مات جنینی جاگہہ ءَ یک برے فریقاں صلاح کنت ءُ گیشینیت ، ھما مردم کہ وت ماں وت جنگ ءَ بوتگ اَنت یک نیمگے امین ءُ نئیم کہ ھمید ءِ چک اَنت ءُ ملک آباد ، تمپ ءَ نندوک اَنت۔ دومی ھما کہ سلاھبند بوتگ اَنت ءُ ارش اش کُتگ آیانی تہ ءَ سے برات اسلم ، پزل ، ازگر کہ سید مھمد ءِ چک اَنت۔ایشانی زامات نئیم ءُ نوروز نامیں گھار زتکے ھم گون بوتگ اَنت، کہ پرسلاہ بوتگ اَنت۔

اسلم ءَ جنگ ءِ میان ءَ سلاہ کش اتگ ءُ نئیم ءَ تیرے جتگ تیر آئی ءِ پھلوگ ءَ لگیتگ کپتگ ،گڑامنی مات ءَ آئی ءِ سر داشتگ ، دومی رند ءَ ازگر دیم ءَ کنز اتگ ءُ لوٹ اتگ ئِے کہ نئیم ءَ بُہ کش ایت منی مات دیم ءَ اتکگ ءُ آئی ءَ گْوشتگ ئِے کہ پہ زمین ءِ چنڈے ءَ نئیم ءَ مہ کش بلے اسلم ءَ تپنگ منی مات ءِ پیشانیگ ءَ داشتگ ءُ تیر جتگ ءُ منی مات شھید کُتگ ۔