Zer behar du hegazkin bat hegan egiteko? Grafismoak aztertzen du hegazkin batean zer den ezinbestekoa eta zer ez hegan egin ahal izateko. Azkenean, bi pieza bakarrik dira behar beharrezkoak: hegoak eta motorra dira. Pilotua bera ere ez da ezinbestekoa.

Transkribapena:

Hegazkin bat metalezko traste bat da, tramankulu astun bat. Hegazkin komertzialek 400 tona inguru dituzte; hala ere, hegan egiten dute. Baina tona bakarreko hegazkin txiki batek ere, berdin. Nola da posible horrelako metal-puska bat han goian mantentzea? Bada modu bat hori jakiteko. Alderantzizko galdera egitea: zer pieza ken diezaiokegu hegazkinari erori gabe?

Begi bistako hautagai batzuk daude. Esate baterako, hegazkinak ez badu 3.000 metrotik gora hegan egin behar, ez du kabina presurizaturik behar. Kabinak tripulazioa babesten du, azken batean, baina ez da hegan egiteko beharrezkoa.

Lurreratze-trena ere kendu dezakegu, eta hegazkina ez da eroriko. Lurra hartzea zailagoa egingo zaio, zalantzarik gabe, baina ez du gurpilik behar hegan egiteko.

Eta kentzen hasita, fuselajea ere kendu genezake. Horrek hegazkinaren aerodinamika aldatuko luke, eta pilotuak hegan egiteko modua egokitu beharko luke, eta, seguruena, hegazkina bera ere bai. Eta potentzia handiagoko motor bat beharko luke. Nolanahi ere, fuselajerik gabe ere, hegazkinak hegan egin dezake.

Jadanik, hegaldian eragiten ari gara, baina oraindik ere jarrai dezakegu piezak kentzen. Isatsaren lemak kenduz gero, hegaldia ezingo da kontrolatu. Hegazkina balantzaka eta noraezean ibiliko da, baina seguruenik ez da eroriko.

Eta kitto. Bukatu dugu. Hemen dago muga. Adibidez, hegoak kenduz gero, erori egingo da, argi dago. Eta motorra ere ezinbestekoa da, hegazkinari abiadura ez bazaio ematen, hegoek ezin dutelako haien lana egin, hau da, airea ezin beherantz bultzatu eta presioarekin jokatu. Ezin da besterik kendu.